Ĉi-jare, la RenKEJtiĝo okazis dum 4 tagoj, de la 20-a ĝis la 23-a de februaro 2025 en Olot.
Estis mia unua internacia renkontiĝo en junulara Esperantujo. Mi ege antaŭĝojis, specife ĉar mi renkontiĝis kun la homoj kun kiuj mi laboros post unu monato, kiam mi alvenos en Barcelono.
Alvenis la atendita ĵaŭdo, la 20-a de februaro, kaj la EKC-membroj ekis sian vojaĝon al Katalunio… krom nia kara Théophile, kiu maltrafis la unuan trajnon. Tamen, li ne lasis la malfruon haltigi lin de la vojaĝo, kaj li alvenis la sekvan tagon, ĝustatempe por prezenti sian prelegon pri “Droguzantoj kaj damaĝoredukto: kiam du rakontoj intersekcas”. Lia sperto estis tre pozitiva laŭ li. Li sentis li mem aŭskultita kaj utila. Li difinas sin kiel aktivulo por la droguzantoj, ĉar laŭ li, ili estas homoj kiel la aliaj. Li estis volontulo kaj laboris en diversaj asocioj dum sia vivo, do li vere volis kundividi siajn sciojn. Li parolis pri malsamaj temoj: unue, li volis klarigi al la aŭskulantoj, kion drogoj faras al la cerbo, kiel vi povas iri de “uzanto” al “toksomaniulo”. Li ankaŭ volis rekonduki la aŭskulantojn al la jaro 1970, meze de la Bandol-afero, kiu kondukis al la leĝo de 1970, kiu bedaŭrinde damaĝas drogulojn. Li parolis pri la historio de damaĝoredukto, ĝia batalo kontraŭ la leĝo de 1970, ĝiaj multoblaj aliroj, ĝiaj principoj, ktp. Fine, li donis informojn pri drogoj kaj praktikajn damaĝreduktajn konsilojn, kaze ke estas droguzantoj en la prelego.
Tie, ni loĝis en Alberg Olot Xanascat, klasika palaceto nomita ‘Torre Malagrida’. Dum la ekskursoj, ni promenis en la naturo tra la (estinta) vulkana regiono de ‘La Garrotxa’. 🌋
Ni ĝuis trinkomanĝan’ nokton, kie tuluzanoj kunportis siajn famajn sukerkovritajn violflorojn. Mi gustumis filipinajn specialaĵojn, kiuj plifortigis mian bedaŭron ne viziti Azion kaj ne partopreni la IJK-n 2025.
Ni aŭskultis prelegojn kaj kompreneble, ni festis ĉiun vesperon. Mi eĉ havis la ŝancon partopreni mian unuan katalunan kurson !
Ĉar estis la 40-jariĝa festo de KEJ 🎂, ni havis prelegon pri la historio de la asocio kaj emociema momento inter KEA-anoj kaj KEJ-anoj. KEJ, pli aktiva ol neniam, multe klopodis por tiu evento kaj eĉ proponis surprizan programeron, dum kiu ni lernis kiel danci la Sardanon. 👯
Finfine, estis tre bela kaj ĝoja sperto 🙂 Ne hezitu partopreni la RenKEJtiĝon venontjare kaj atendante, vizitu la KEJ-ligilarbon: https://linktr.ee/JCE.KEJ?utm_source=linktree_profile_share<sid=35527647-4196-4124-b385-3544a9d4ed1b
