Fine de junio (de la 18a ĝis la 28a de junio) okazis la TTT2, Trejnado por Trejnistoj en Tuluzo. Ĝi estas projekto subvenciita de Eŭropa Unio kadre de Erasmus+, celante la trejnadon de novaj trejnistoj kaj plibonigon de la kapabloj de la nunaj. La partneroj estas Kosmo Strategio (Britujo), Dana Esperanto-Asocio (Danio), Esperanto-Kultur-Centro de Tuluzo (Francujo), Bunta Esperanto-Asocio (Italujo) kaj Bjalistoka Esperanto-Societo (Polujo).
Dank’ al la projekto iĝis sep partoprenantoj agnoskitaj trejnistoj, inkluzive kvar novaj TEJO-trejnistoj. La cetero de la partoprenantoj jam partoprenis la programon en 2017, kaj ĝuis la okazon por pliboniĝi.
Dum naŭ tagoj transdonis al ni la kvar TEJO-trejnistoj siajn sciojn kaj ilojn pri la profesio de trejnisto, miksante teorion kaj praktikon. Jen ekzemploj da temoj kiujn ni vidis: prezenti antaŭ publiko, lernostiloj, lernoceloj, tempoplano, tipoj da aktivaĵoj, posttrejnaj taskoj, ktp.
Tiel ni akiris la bazajn kompetencojn ebligante al ni liveri mem nian unuan trejnadon! Mi fieras pri mia unua sperto kiel trejnisto. Duope aŭ triope, ni preparis 2 horan trejnadon kiun sekvis la aliaj partoprenantoj. Dum la preparado helpis nin la spertaj trejnistoj, respondante al niaj demandoj, gvidante nian laboron. Poste ili detale retrokuplis kaj takte indikis al ni kio estis bona, kaj ne nur kion plibonigi sed ankaŭ kiel.
Kiam ni ne estis laborantaj, ni kune manĝis en la domo kie ni loĝis dum unu semajno. La volontuloj de EKC kuiris por ni nekredeble bonajn pladojn!! Ni ankaŭ kelkfoje manĝis en restoracioj, por malkovrigi la lokan kuirarton.
Aldone estis organizita vizito de Tuluzo gvidata de JoMo. Bedaŭrinde pluvis dum ĝi, sed tio ankaŭ estas tuluza sperto: neatendita pluvo post suna tago! 😉
La du lastaj tagoj ni estis en ĉarma gastejo en Arrout, por la kutima staĝo de EKC. Tie ni promenis en la Pireneoj, spiris puran aeron kaj vizitis la lokan preĝejeton. Lucas ekbruligis fajron la unuan vesperon, kaj ni kune festis en bela etoso la duan.
Mi ĝojas pri mia partopreno al la trejnado, fieras pri mia fariĝo kiel trejnisto kaj pretas plu lerni kaj trejni!
