Hieraŭ, la 1an de Aprilo, trafis nin aĉa ŝerco, terura novaĵo: forpasis Kiki, matene, neatendite, ŝoke. Post nekropsio, ni eksciis ke temis pri infarkto.
La plej novaj tuluzanoj eble ne havis la ŝanĉon renkonti ŝin. Christine, aŭ Kiki, kiel ni kutimis nomi ŝin, malpli esperantumis la lastajn jarojn sed restis fidela membro de nia asocio.
Ŝi estis dum pluraj jaroj estrarano, sekretario de EKC , sed ankaŭ la voĉo de Esperanto-magazino, aktorino de la Teatro-Tuluzo-Trupo, prezentanto de pluraj Zam-festoj, elstara klaĉanto de manĝoklaĉoj, gastiganto de esperantistoj… Unu el ŝiaj lastaj projektoj en 2018 estis registri voĉon por la nova Metodo 11. Ŝi estis libera, ĝoja kaj amikema homo, simple amiko por multaj el ni.
Komunikaĵo de Flo, de Vinilkosmo
En 2012, ni intervjuis ŝin por nia blogo, ŝi rakontis iom pri Esperanto, sia agado, siaj ŝatoj, pri radio kaj teatro…
Renkontiĝo kun asociano: Christine
Ni preparas specialan radio-elsendon omaĝe al ŝi, por la fino de la monato, kontaktu nin se vi volas kontribui.
Jen kelkaj fotoj memore al ŝi… sendu al ni aliajn belajn fotojn por ke ŝia rideto restu longe en niaj koroj!
MARION
