La 27-an de majo ekovilaĝanoj de Sainte-Camelle akceptis samideanojn el Tuluzo kaj el diversaj lokoj en Arieĝo.
Ili montris al ni kiel funkcias la ekovilaĝo, do ni promenis tra arbaro, herbejoj kaj domaro. Ni vidis privatajn hejmojn, lignajn konstruaĵojn por akcepti gastojn, komunajn kuirejojn kaj manĝejojn, kunvenejojn kaj ĉion necesan por akcepti ĝis milon da gastoj.
Loĝantoj de la ekovilaĝo partoprenas en diversaj iniciatoj, kiuj inkluzivas konstruadon, ekologiajn projektojn kaj homan disvolviĝon ĉirkaŭ pozitivaj valoroj kiaj inkluzivo.
Poste ni komune manĝis en la trinkejo La Luciole situanta en la koro de la ekovilaĝo. Sekvis interkonatiĝo kaj vigla interŝanĝo pri ĉies projektoj kaj estonta kunlaborado. Sesopo da ekovilaĝanoj eklernas Esperanton kaj strebas sufiĉe bone regi la lingvon por povi interkomuniki kun alilingvaj samideanoj. Por tion atingi ili petegas subtenon de pli spertaj Esperanto-parolantoj, inter kiuj troviĝas Jorgos, la Marodanoj kaj Tuluzanoj.
En la ekovilaĝo estas planita okazigo de grava internacia renkontiĝo en jaro 2025a ĉirkaŭ ekologiaj temoj kiaj permakulturo kaj klimatŝanĝiĝo. La projekto estas prezentota en la UK en Torino, inter alie dum la asocia foiro, klopodante logi diversajn asociojn kaj organizaĵojn, kiuj estas ligitaj al la ĉeftemoj.
Sekve MoBo gvidis trejnadon pri tio, kiel lerte prezenti Esperanton al publiko en aranĝoj kiel la Lingvoforumo okazonta sekvan tagon en Tuluzo. Post prezento de la atentindaj konceptoj, la partoprenantoj praktike ekzercis rolante sinsekve varbotojn kaj varbistojn.
Jen enhavriĉa tago, kiun iuj partopenis alveturinte parte trajne (de Tuluzo al Pamiers) parte bicikle (de Pamiers al Sainte-Camelle).
Vizitu retejon de la ekovilaĝo.
