Kial nova volontulino?
Por inoj kiuj travivas perfortojn faritaj sur civitanoj kadre de la nuna konflikto en Goma RDC, iliaj opcioj por rekonstrui vivon estas tre limigitaj. Stabila laboro, psikologia subteno, kaj fizika sekureco ne facile troveblas en milito-zono.
Estas pro tio ke la asocioj Asocia Nova Familio (RDK), EKC (Francio), kaj Esperanto Plus (Tanzanio) kunlaboras. Ni celas krei novan modelon, en kiu esperanto ebligas pozitivan estontecon al junuloj kiel Suzi.
Pri kio temas la projekto?
La projekto: Suzi iros al Esperanto-Plus en Tanzanio, tie kie ŝi povas fari ponton inter la du afrikaj landoj kaj esperantaj asocioj, kaj resaniĝi en paca loko.
Samtempe, ŝi iĝas distanca volontulo de EKC, kaj kreos blogojn kaj enhavojn por la EKC-retejo pri ŝiaj aventuroj en nova loko, kaj ricevos financan subtenon dank’al reto de donantoj esperantistaj. Tio eblos kontraŭ nur eta kvanto da mono, pro la tre malsamaj vivkostoj en okcidenta Eŭropo kaj Tanzanio – kvanto kiel €100 monate permesas vivi tie.
Kiu subtenas la projekton?
Ĉi tiu oportuno eblis danke al la subteno de niaj internaciaj kaj esperantistaj retoj.
Grandegajn dankojn al Oscar, Joseph, kaj Sylvie el Irlando; al Lucas kaj Olivier el Francio; kaj Ines kaj Christoph el Germanujo; estas pro vi ke tiu projekto okazas, kaj ni elkore dankegas vin.
Se vi deziras pliajn informojn, kontaktu Simon per Telegramo aŭ per retpoŝto (maria()shiggins(@)outlook(.)com, forigu la krampojn).
Kaj nun, sen pli da ceterumado…
Suzi prezentas sin!
Saluton,
Mi nomiĝas Suzi.
Kongolandano el DRK, loĝanta en la urbo Goma, mi laboras en la Asocio Nova Familio kiel zorganto por la infanoj, kiujn ĉi tiu asocio subtenas.
Dank’ al financa helpo de ANF, mi finis miajn universitatajn studojn antaŭ 9 monatoj pri publika sano, specife en la fako pri epidemiologio ĉe la Universitato de Goma (DRK).
Kiel esperantisto, mi volas plulerni por pli bone paroli kaj skribi ĉi tiun lingvon. Mi ankaŭ volas lerni aliajn lingvojn kaj malkovri novajn spertojn enkadrigitajn de kulturoj kaj modoj. Mi povas paroli pri nia kongola kulturo kaj aliaj afrikaj kulturoj dum horoj aŭ tagoj, depende.
Post la fruktodonaj kontaktoj kun Simon, mi estas feliĉa kaj kontenta malkovri Esperanto-Kultur-Centron kaj iĝi nova volontulo tie.
En mia libera tempo, mi ĝuas plekti, prizorgi infanojn, malkovri belajn pejzaĝojn, kaj ankaŭ renkonti novajn homojn. Vi povas trovi min kantanta sola, aŭ dancanta laŭ muziko (precipe kongola rumbo) kaj farante novajn malkovrojn.
Dankon.
– Suzi
Ekde junio 2025, ni preparas la vojaĝon al Tanzanio. Dank’al la subtenantoj (Oscar, Joseph, Sylvie, Olivier, Lucas, Ines, Christoph), ni kolektis ĝis nun sufiĉe da mono por aĉeti por Suzi uzitan poŝtelefonon, por ke ŝi povu sekure vojaĝi de Goma tra Ruando al Tanzanio. Tio ankaŭ ebligos al ŝi verki artikolojn sen bezono de transskribo, kaj fari fotojn kaj filmetojn por blogoj. La venonta paŝo nun estas finado de la necesaj administraĵoj kaj aĉetado de la biletoj por la vojaĝo!
Ĝis baldaŭ por pli da novaĵoj pri la aventuroj de Suzi!
