Sabaton la 16an de decembro 2023 belega urba salono gastigis sukcesan Zamenhof-tagon en Lodève, urbeto ĉe Larzak-altebenaĵo, kun ekspozicio, disko- kaj libro-servoj, prelegoj kaj koncerto de JoMo.
En salonego ene de moderna konstruaĵo « Espace Marie-Christine Bousquet » informpaneloj kaj tabloj kovritaj per Esperanto-libroj kaj KD-oj ĉirkaŭis la spacon en kiun envenis esperantistoj el la regiono kaj scivolemaj lokaj loĝantoj, inter kiuj la prezidanto de la komunumo de komunumoj de Lodevlando kaj Larzako.
Hubert Martin, aktivulo el Le Caylar (kie Hubert ankaŭ estas kunorganizanto de la festivalo kies temo estas « laŭdo de malrapida vojaĝo » ) prezentis la historion kaj la trajtojn de Esperanto al scivolema publiko. Floréal Martorell, gvidanto de la muzikeldonejo Vinilkosmo aŭdigis erojn de albumoj kaj muzikajn filmetojn por montri panoramon de la rete alirebla muziko en Esperanto per diversaj rimedoj: la retejo de Vinilkosmo mem kun ties abonklubo, jutubo, kaj pluraj konataj muzikdissendantoj. La neesperantista publiko tiel ekmalkovris kiom vasta kaj abunda estas la muzika kulturo en la Internacio Lingvo.
La festo finiĝis kun brila recitalo de JoMo, kiu forte impresis al la publiko. JoMo regalis nin per multlingva repertuaro kantante en ukrajna, pola, hispana, okcitana, franca, angla, jida, itala lingvoj kaj eĉ en Esperanto !
