Inter la 12a kaj 16a de aŭgusto 2021 partoprenis tri EKC-anoj en kunveno en Kroatio rilate unu el la Erasmus + projektoj en kiuj ni aktivas. Kio okazis tie? Jen sube raporto.
Pri kio temas la projekto?
La kunsido okazis en la kroata urbeto Đurđevac, kiu situas nordoriente en la lando, apud Hungario. En ĝi troviĝas pluraj aktivaj esperantistoj kiuj menciinde fondis la Dokumentan Esperanto-Centron (DEC), kiu prenis por si la mision arkivi kaj konservi dokumentojn rilate al la historio de la Esperanto-Movado. Al tiuj aktivuloj ni ŝuldas ankaŭ la glatan organizon de tiu ĉi kunsido.
Aldone de DEC kaj EKC, pluraj Esperanto-organizoj estas enplektitaj en la projekto: BES (Bjalistoka Esperanto-Societo), Kosmo Strategio kaj BEA (Bunta Esperanto-Asocio). Pluraj invititoj ankaŭ kontribuis al la programo, kiel vi vidos sube.
La ideo de la projekto Reta Edukado Nun naskiĝis komence de la kronvirusa pandemio, kiu subite enretigis vivojn, edukadon kaj konsekvence evidentigis adaptiĝan bezonon. La projekto ĝenerale celas transdonadon de spertoj kaj scioj rilate retan edukadon, pretigi vojon por postaj iniciatoj pere de engaĝigo de aktivuloj kaj kreo de materialoj por uzado de aliaj organizaĵoj kaj individuoj.
Kio okazis tie?
Tiu ĉi kunsido estis la unua ĉeesta de la tuta projekto kaj portis fokuson pri arkivado en la Esperanto-Movado. Menciinde ĉefrolis ankaŭ bitigado kaj enretigo de materialoj kaj konservado de paperaj arkivoj. Estas cetere temo kiu respondis al aktualaĵoj en periodo kiam estas diskutita la estonteco de la Centra Oficejo de UEA kaj TEJO en Roterdamo kaj ĝiaj arkivoj.
Rilate spertotransdonon okazis pluraj riĉaj prelegoj pri diversaj iniciatoj, kies ligiloj disponeblas sube kaj certe vizitindas.
Prelegis Ana Manero el Hispana Esperanto-Federacio (HEF) pri sia longdaŭra laboro rilate la Esperanto-Bibliotekon Juan Régulo Pérez en Madrido kaj Bitotekon. Tiu estas impona projekto de tiu biblioteko kiu disponigas amason da libroj kaj dokumentoj de tiu hispana kolekto. Simile, László Szilvási venis de Budapeŝto por prezenti sian iniciaton STEB: Scienca Teknika Esperanto-Biblioteko, kiu kolektadas fakajn kaj teknikajn materialojn rekte atingeblajn rete, responde al manko de disponeblaj materialoj tiuterene.
La kazo de arkivado en Esperantujo estis traktita de Pascal Dubourg, historiisto laboranta en Berlino kiu interalie interesiĝas pri la historio de la Movado. Li evidentigis la defiojn de arkivoj de Esperantujo, kiuj troviĝas dise tra la mondo kaj ne ĉiam estas profesie prizorgataj. Pascal ankaŭ prezentis kelkajn el siaj projektoj kiel Militrakontoj, kiu prilumas la transnaciecon de la Dua Mondmilito pere de esperantlingvaj personaj rakontoj kaj beletraĵoj.
Ni ankaŭ aŭdis pri eldonado kaj kompostado de materialoj (paperaj aŭ retaj) pere de prelegoj de Josip Pleadin kaj Przemysław Wierzbowski (“Pŝemek”). Tiu lasta okazis rete, samtempe ĉeestis la kunsidanoj en Kroatio kaj aliaj retaj partoprenantoj.
EKC estis tie reprezentita de tri membroj: Marion kaj du volontuloj, Lucas kaj mi mem, Valentin. Estis okazo por nia loka asocio kolekti spertojn pri kiel pli bone zorgi siajn arkivojn, alivorte certigi pri spuroj de sia agado en la historio de la Movado. Ni intervjuis organizantojn de la projekto, kies voĉo aŭdeblas en pluraj niaj radioelsendoj. Se vi volas pli da detaloj pri la historio de la projekto entute, Sara Spanò kaj Francesco Maurelli rakontis ĉion al niaj ĉeestantoj: vidu la subajn elsendojn de Esperanto-Magazino:
Ni aldone malkovris iom da Kroatio, kaj menciinde la sidejon de DEC, freŝkonstruita domo en kiu kuŝas profesie traktataj dosierujoj plenaj je esperantistaj historiaĵoj. Gratulon al Josip kiu kolektadis kaj traktadis tiujn trezorojn tra la jardekoj!
Konkludoj kaj sekvaj paŝoj
Inter la konkludoj de tiu renkontiĝoj estas planita verko de tre koncizaj rekomendoj pri arkivado cele al lokaj asocioj, kiel la nia, por glate enkonduki aktivulojn al arkivado. Ni povis ankaŭ rapide apliki la rekomendojn post la renkontiĝo kiam ni ricevis 20 skatolojn da revuoj. Danke al retlisto menciita dum la kunsido (bibliotekoj@googlegroups.com) ni trovis taŭgajn ricevontojn por valorigi tiun kolekton.
De persona vidpunkto, mi ankaŭ konsciiĝis pri la valoro de arkivoj. La spertoj transdonitaj pripensigis min pri la stato de la arkivoj de TEJO, en kiu mi aktivas. Mi konsekvence komencis levi la temon de ilia estonteco ene de la organizo.
Nia sekva kunsido estas planita en Decembro en Bjalistoko ĉe BES kaj temos interalie pri aŭtorrajtoj. Ĝis tiam!
